Ensino público

O espírito que fixo xermolar a Lei Wert foi o de destruír o ensino público e, malia estar paralizada en todos aqueles aspectos que aínda non entraran en vigor,  parece que o tipo de ensino que formula, disfrazado sutilmente de supostas melloras e innovacións pedagóxicas, está calando entre algúns docentes. Conceder maior autonomía aos centros, previsto na lei, e ás direccións dos mesmos, como demandaba hai uns días na prensa, Isabel Ruso, presidenta da Asociación de directores de institutos de Galicia, o único que provocará será agrandar as diferenzas xa existentes entre uns centros de ensino e outros. Para manter a igualdade de oportunidades entre o alumnado,  a inspección tería que transmitir uns criterios claros e uniformes e as direccións  dedicarse exclusivamente á función xerente e organizativa. Aspirabamos a seguir o modelo educativo finlandés e imos camiño das antípodas coa constante avaliación do alumnado, papelame absurdo e terminoloxía críptica. As sibilinas manobras da dereita de sempre. Non nos deixemos enganar.