Por segundo ano consecutivo, o Real Coro “Toxos e Froles” organiza o seu Concurso de Cuartetos, con instrumentos tradicionais galegos. A final do certame terá lugar o próximo sábado, 23 de febreiro, ás 20.30 horas, na sede do Real Coro (Magdalena, 220) e está dotado dun premio único de 1.200 euros.
As formacións seleccionadas para esta cita son Xente Nova, de Ferrol; Vedoira, de Lugo; Os Picurruchos, de Lugo, e Angaso, de Ourense. Mentres delibera o xurado actuará o grupo de cantareiras Algarabía, pertencente á asociación de veciños de Lago, en Valdoviño.
Este concurso será a segunda proposta cultural e musical que se desenvolve dentro das Xornadas Culturais Abertas postas en marcha polo Toxos e Froles durante o presente 2013 e que terá continuidade ao longo deste ano. Así, o próximo 23 de marzo actuará na sede da entidade ferrolá o cantareiro e percusionista Davide Salvado, co seu novidoso xeito de entender e representar a música tradicional. A continuación, unha das grandes atraccións da temporada celebrarase o 27 de abril, data na que estará un dos máis ilustres representantes da música tradicional peninsular, o vasco Kepa Junquera, así como o prestixioso grupo castelán La Musgaña. A entrada aos concertos é libre.
aniversario e irmanamento
O próximo 1 de xuño o Real Coro Toxos e Froles celebrará o seu 98 aniversario nun acto que se levará a cabo no teatro Jofre. Ademais da case centenaria institución ferrolá, actuarán nesa xornada Cántigas da Terra, da Coruña, e o Rancho de Rendilheiras da Praça, de Vila do Conde, localidade lusa irmanada con Ferrol.
De feito, o citado acto tamén servirá para conmemorar os primeiros 40 anos de irmanamento entre a localidade galega e a portuguesa.
