A música gospel converteuse nunha cita clásica xa no Nadal de Narón, e de novo este ano contarase con dúas formacións chegadas desde os Estados Unidos para facer unha xira por toda Galicia que terá parada, os días 18 e 19 de decembro, no Pazo da Cultura. É dentro dun circuíto que inclúe tamén ás cidades de Vigo, A Coruña, Santiago e Pontevedra e que se realiza en colaboración coa Fundación Novacaixagalicia.
A primeira función en Narón será o mércores 18 de decembro, ás 20.30 horas, a cargo do Georgia Mass Choir. Trátase dunha formación xa coñecida na localidade, pois actuou en decembro de 2009. Nesta ocasión presentan un programa de homenaxe a Whitney Houston, cantante coa que colaboraron na película “O predicador” e que, na súa banda sonora, incluíu tres temas dos grandes éxitos deste coro. O Georgia Mass Choir fundouse no ano 1983 e desde entón ten publicados máis dunha ducia de discos. Está dirixido polo reverendo Milton Biggham.
A New Orleans Gospel Chorale tomará o relevo ó día seguinte, xoves 19, con Bridget A. Bazile como solista. Esta cantante coñece ben Ferrolterra, xa que actuou en decembro de 2008 en Narón co Joyful Gospel Choir e na Semana Santa de 2009 no teatro Jofre, nesa ocasión con The Moonwalk Singers. Comezou como voz principal con The New World Ensemble e iniciouse na música espiritual negra cos Moses Hogan Singers, de onde proceden os membros da coral de Nova Orleáns. Debutaron en 1998 acompañando á soprano Barbara Hendricks e nesta xira por Europa presentarán “The Art of Negro Spiritual”.
