Roger de Flor e os Os Silvestres presentan o vídeo adicado a Ferrol Vello o día 10 no Carvalho Calero
O próximo día 10 de xaneiro, sábado, Roger de Flor e os Silvestres presentarán no Centro Cultural Carvalho Calero o seu novo videoclip. Trátase do tema “Ferrol Vello” que, dirixido polo propio Rogelio Arias e realizado por Álex Devesa, fai o duodécimo traballo audiovisual do artista fenés, nestes caso coa súa banda habitual, Os Silvestres.
Trátase dunha adaptación feita polo batería Sergio Galego do tema “Dirty old town” do compositor británico Ewan MacColl, popularizado nos anos 80 pola lembrada banda The Pogues. Aquí, a canción convértese nun desgarrador laio pola situación calamitosa do histórico barrio ferrolán.
gravación
O traballo foi gravado o pasado verán en diferentes localizacións de Ferrol Vello (peirao, Casa Anca ou nun paseo pola ría en barco) e conta entre os seus participantes ao propio Roger de Flor, Sergio Galego, Cabe García así como a Juan Padín, Carlos Mosquera, Leandro Lamas, Lino López e outra xente do mundo artístico e musical ferrolán que quixo participar na homenaxe.
A presentación do videoclip de “Ferrol Vello” no Centro Cultural Carvalho Calero (no Ensanche A) estará seguida dun pequeno concerto no que Roger de Flor e Os Silvestres interpretarán a versión do tema de MacColl e adiantarán as cancións do seu segundo traballo discográfico, logo de confirmar co primeiro a súa boa sintonía.
