A Casa da Cultura de Neda acolleu onte o acto de clasusura do curso dos Programas Formativos Básicos desenvolvidos por catro institutos da comarca (Ferrol Vello, Canido, Catabois e Fernando Esquío) coa colaboración de empresas da zona. A modalidade formativa, que combina a formación teórica nos centros coa práctica nos centros de traballo, continúa a manter no 30% o índice de inserción laboral do alumnado inscrito.
Así, dos 75 alumnos matriculados nos diferentes perfís profesionais ofertados (Comercio, Industrias Alimentarias, Servizos de restauración, Limpeza e Almacenaxe), 23 acadaron un contrato de traballo. Se só se ten en conta a cifra de estudantes que superaron o curso (43), a cifra de acceso ao mercado laboral incrementaríase ao 53%. Séguese a cumprir así un dos principais obxectivos dos programas, que é a posibilidade de introducir no ámbito laboral a este alumnado. Xunto a este, no acto de onte derónse cita tamén os representantes dos IES implicados, as empresas de formación específica (cinco) e de prácticas (19 firmas e 30 centros de traballo) así como representantes dos concellos e das consellerías que apoian uns programas pioneiros na comarca de Ferrolterra hai xa preto de dúas décadas.
