Tralo éxito que supuxo o pasado ano a adaptación radiofónica nos cines Dúplex de “La guerra de los mundos”, de H.G. Wells, a compañía En Tránsito, dirixida polo profesor Miguel Castro, repite o próximo xoves 14 ás 20.00 horas no Ateneo Ferrolán cun texto propio, máis actores e un xénero orixinal: o teatro radiofónico con música e cómics. A peza en cuestión é “Zombie factoría”, unha obra humorística elaborada coa colaboración do Ateneo e Fuco Buxán con trasfondo social inmediato escrita polo propio Castro e José Torregrosa. O espectáculo inclúe as ilustracións de Fernando Ocampo e a música de David García.
En canto ao contido da obra, avanza Miguel Castro: “Despois do bo sabor de boca que nos deixou a todos ‘La guerra de los mundos’, queriamos facer unha obra propia. Esta é unha metáfora do mundo actual e unha crítica ás persoas pretendidamente apolíticas, así como ao papel dos sindicatos en todo o que está pasando. A historia en si fala duns zombies que infectan unha cidade e as súas fábricas e onde o protagonista dubida se loitar ou non facelo, se mollarse, comprometerse, ou non. Pero todo con moito humor”.
Trala súa estrea “Zombie factoría” será colgado en Youtube en formato radiofónico, coa música de David García e os debuxos en formato cómic de Ocampo.
