O salón de actos do campus de Esteiro acollerá esta tarde, a partir das seis, a proxección do documental “O mundo tras Julius”, centrado na vida deste mozo alemán que vivía na rúa e que vagou, antes de morrer en Lugo, por distintas cidades galegas.
A peza servirá así para inaugurar a primeira edición do Ciclo de Cine e Dereitos Humanos promovido polas áreas de Cultura e Cooperación e Voluntariado do campus local.
Ademais de contar coa presenza dos autores da obra, Pablo J. Colado e Enrique R. Novoa, tamén participarán na cita desta tarde voluntarios do programa Sen Teito para o foro que terá lugar trala proxección.
O ciclo continuará no mes de xaneiro e rematará en xullo. As proxeccións, entre as que se inclúen “El Círculo”, “Todos nos llamamos Ali”, “El inquilino” ou “La Sal de la Tierra”, por exemplo, terán lugar os segundos luns de mes ás 18.00 horas. A entrada é libre e gratuíta, polo que se anima á cidadanía a asistir.
