O Centro Torrente Ballester acolle desde onte dúas novas exposicións para as próximas semanas, trátase de “Diurnes, Picasso/Villers” e “En torno a Picasso”. A primeira é un proxecto nacido da colaboración entre o artista malagueño e o fotógrafo André Villers no que o primeiro levaba ao collage as imaxes do segundo. Un traballo realizado ao longo dos anos 50 e publicado en 1962 do que en Ferrol poden verse unhas 30 obras.
A outra exposición é “En torno a Picasso”, na que os creadores galegos Juan López e Misha Bies Golas reflexionan, a través da música e collages, sobre a proposta picassiana.
unha revisión creativa
Para o artista multidisciplinar Juan López (Ferrol, 1973) “o noso traballo foi reinterpretar a obra de Picasso e Villers a través da técnica do collage. Fundamentalmente Misha Bies Golas fixo o traballo en papel e eu con instalacións e sobre todo en formato sonoro, algún específico e outro recuperado doutros traballos pero que encaixaba moi ben nesta proposta do Torrente Ballester”. López insiste no concepto de “diálogo” entre diferentes xeracións artísticas para relacionar as dúas exposicións.
Así mesmo, o artista ferrolán destaca que aínda que xa expuxera algo do seu traballo creativo en Ferrol, concretamente na Galería Sargadelos, “esta é a primeira vez que o fago no Centro Torrente Ballester, que é un espazo espléndido. Esta mostra sobre Picasso foi todo un reto, ocupando a zona nova e a parte da rampa. Pero o resultado creo que valeu a pena”, destaca López.
