A asociación cultural Muíño do Vento organiza o próximo venres e sábado un programa de actividades ao redor do mundo dos maios, a tradición que en Galicia marca o ciclo de exaltación da natureza trala chegada da primavera. Así, o venres comezan as actividades no local da Sociedade Galega de Historia Natural na porta de Canido. Alí, a partir das 19.00 horas, levarase a cabo a elaboración dun Maio. O acto precederá á conferencia que ás 20.00 horas promunciará o mestre, etnógrafo e historiador galego Clodio González Pérez, un dos investigadores que mellor coñece esta festa popular.
premios, música e xantar
O sábado as actividades matinais organizadas pola asociación Muíño do Vento trasládanse á praza do Cruceiro de Canido. Alí ás 12.00 horas entregarase o I Premio Muíño do Vento de Textos de Contraportada, así como os galardóns do certame escolar “Inventa unha flor”. Posteriormente actuará o alumnado do CEIP Cruceiro de Canido, Mundo Piruleta Teatro, a escola de baile Mario Escudero, o gaiteiro Antón Varela e a Quadrilha de Campo de Chao.
O acto final celebrarase no parque do río Insua, cun xantar popular que pretende dar continuidade á festa e reivindicar o patrimonio local.
