Dous dos centros presentes no curso de formación xa teñen implantado o proxecto LÓVA. O primeiro en embarcarse neste plan foi o CPI San Sadurniño, o único en Galicia que desenvolveu LÓVA nos tres cursos anteriores e nas tres etapas educativas: Infantil, Primaria e Secundaria. Os mestres directamente implicados na implantación do proxecto desde o curso 2013-2014 ata a actualidade son Ana Isabel Vázquez Rico, María del Mar López Somoza, Ana María Brea Santiago, Clara Goás Vargas e Juan M. Fernández Fernández. No CPI As Mirandas, de Ares, a mestra de música, Lara Valcuende, Amelia Seoane-Chanes, titora de segundo de primaria, e a profesora de música de cuarto da ESO, Teresa Frieiro, implantaron LÓVA no ano lectivo 2016-2017. “Eses docentes, que recibiron a formación intensiva do curso de verán, son un exemplo de profesionalidade e de compromiso pedagóxico. Ademais, todo o profesorado deses centros e os equipos directivos foron e son parte importante do proxecto, xa que sen o seu apoio, tería sido moi difícil desenvolvelo e acadar a calidade e éxitos logrados”, tal e como destacan desde a Consellería de Educación. l
