A Asociación de Veciños de Esteiro e a Semana de Poesía Salvaxe, en colaboración co Concello de Ferrol e a Deputación da Coruña, inauguran esta tarde ás 20.30 horas o novo ciclo “Noite de cine e poesía” na sala Dúplex con entrada de balde. A cinta escollida para a estrea é “Bande à part” (1964), de Jean-Luc Godard. Unha longametraxe protagonizada por Anna Karina, Danièle Girard e Louisa Colpeyn que une comedia, drama e cine negro. Trátase dun traballo que influíu nas novas xeracións de directores das últimas décadas como Quentin Tarantino ou Hal Hartley, entre outros.
O 14 de febreiro poderase ver “As mil é unha noites” (1974), de Pier Paolo Pasolini, na que o mestre de Bolonia ofrece a súa particular visión do clásico da literatura árabe a través de varias historias relacionadas. O 21 de febreiro o protagonismo será para o documental histórico co clásico “Homes de Arán”, de Robert Flaherty, sobre a dura vida dos mariñeiros do norte de Irlanda nos anos 30.
Finalmente, o día 28 clausúrase a programación de “Noites de cine e poesía” trala proxección da longametraxe “Deus e o diaño na terra do sol”, unha cinta de Glauber Rocha que inaugurou nos anos 60 o denominado Novo Cinema Brasileiro.
