A biblioteca de Ortigueira celebra hoxe o Día Internacional do Libro cun programa que comeza ás cinco da tarde co sorteo de dous lotes de libros –un infantil e outro para adultos–, dentro da proposta “Sementando lecturas”, coa que se premia ós socios que fixeron uso do servizo de préstamo e devolución durante este mes.
Media hora despois Fátima Fernández encargarase de levar adiante unha sesión de contacontos dirixida ós rapaces. Titúlase “As dúbidas dos animais” e está incluída dentro do programa “Ler conta moito”, financiado polo Concello e a Xunta.
Outra proposta para celebrar dun xeito especial este día que conmemora a morte de Cervantes, Shakespeare e de Inca Garcilaso de la Vega é a apertura dunha exposición bibliográfica en lembranza de José Luis Sampedro, quen faleceu hai uns días. Este economista e escritor participou na inauguración da segunda Universidad Popular de Ortigueira.
concurso de marcapáxinas
Tamén a biblioteca ortegana organiza, xunto co colexio de Educación Infantil e Primaria José María Lage, un concurso infantil de marcapáxinas. Este ano a temática cínguese a Federico Maciñeira, persoa a quen, desde a asociación Ortigueira Literaria Dixital, se lle dedica todo 2013, con motivo do 70 aniversario da súa morte.
Os escolares da localidade poden participar nun concurso no que se premia ó gañador cun lote de libros, ademais dun agasallo especial. O mellor deseño será empregado como regalo –un marcapáxinas– ós usuarios da biblioteca. Tamén se outorgarán catro segundos premios (un por ciclo de ensino), consistentes en lotes de libros.
Para explicar ós nenos quen era Federico Maciñeira e, sobre todo, o seu traballo en arqueoloxía, na aula Cemit están asistindo a charlas didácticas coas que achegarse a este ortegán ilustre.
