A AVV de Caranza presentou onte o novo boletín do barrio, un acto que contou coa presenza de María del Pilar Rodríguez Venancio, directiva da entidade, e da concelleira de barrio, Rosa Martínez Beceiro.
Un total de 5.000 unidades forman a tirada da publicación na que se recolle información sobre recursos de entidades, empresas e actividades que se levarán a cabo durante os meses de abril, maio e xuño en Caranza. Martínez sinalou “a variedade da programación ofertada” dedicada ao ocio, a cultura, o deporte e a formación; ademais da importancia que ten o labor social.
O obxectivo da iniciativa é que os veciños estean informados das actividades que se levan a cabo na zona. O inicio da programación será hoxe cunhas conferencias sobre saúde ás 19.00 horas no Centro Cívico de Caranza; ademais, entre as actividades atópanse a “I Marcha Ciclista”, un mercadillo de segunda man a beneficio da Cociña Económica, proxeccións de cine, charlas sobre técnicas de procura de emprego, un taller de memoria e exposicións. A edil manifestou que as iniciativas son innovadoras e que “o movemento asociativo tan activo é unha riqueza para o barrio”. Engadiu que “é unha asociación de veciños cun gran interese e preocupación polos temas sociais”.
