O Ateneo Eumés, o colectivo Terra e o Concello de Mugardos organizan diversos actos ao redor da figura de Francisco Martínez Leira, “Pancho” (1916-1954), un dos últimos guerrilleiros antifraquistas, acribillado a balazos nunha emboscada da Garda Civil na parroquia eumesa de Ombre hai hoxe 60 anos. Así, un programa de charlas, concertos e proxección de documentais comezan hoxe ás 12.00 horas no cemiterio da parroquia mugardesa de Meá, onde se fará unha ofrenda floral. As actividades continúan o 16 de xaneiro ás 19.30 horas no local social do Colectivo Terra de Pontedeume (Rúa Boavista, 6), cunha tertulia co historiador Bernardo Máiz sobre “Pancho” e os guerrilleiros antifranquistas, e un concerto posterior a cargo de Mini e Mero. O 23 de xaneiro, o salón de plenos do Concello de Mugardos, acolle outra charla de Bernardo Máiz e xente que coñeceu ao guerrilleiro. O 13 de febreiro, de novo no local do Colectivo Terra, proxectarase o documental “A cidade da selva”, de Helena Villares e Pilar Faxil, cunha tertulia posterior con Carlos Méixome.
Finalmente, o programa culmina o 20 de febreiro no Salón de Plenos do Concello de Mugardos coa proxección do documental “As silenciadas”, de Pablo Ces. O acto, e a homenaxe, rematarán cunha tertulia coa profesora Aurora Marco. n
