As instalacións de Navantia volverán ser escenario dunha interesante iniciativa escolar. Ao igual que sucedeu hai dous anos –cando máis dun milleiro de rapaces e rapazas da comarca interpretaron xunto a Guadi Galego a canción “Chea de vida” nun dos talleres da factoría ferrolán–, o estaleiro abrirá este venres de novo as súas portas aos escolares.
O baile tradicional galego será, desta volta, o protagonista. Máis de 660 alumnos e alumnas dun total de 22 centros educativos da comarca bailarán todos xuntos unha muiñeira que será interpretada en directo pola Banda das Crechas.
O acto, bautizado co nome “Un mar de muiñeiras”, está avalado polo Centro de Formación e Recursos (CFR) de Ferrol e organizado de forma conxunta co Grupo de Traballo de Danza Tradicional do propio CFR.
“Esta performance didáctica representa a cristalización práctica do traballo desenvolvido nos últimos dez anos polo devandito grupo de traballo entre o alumnado dos centros educativos integrados no CFR Ferrol co obxectivo confeso de facer realidade a integración da danza tradicional de Galicia, ese Patrimonio Inmaterial, no currículo escolar”, salientan desde a organización.
A muiñeira, que será interpretada en directo pola Banda das Crechas, desenvolverase nunha das naves de Navantia, que cede así unha vez máis as súas intalacións para realizar e gravar a actuación, “implementando así no proxecto a simboloxía de realizarse nun lugar emblemático da nosa comarca”, enganden.
O acto enmárcase, segundo apuntan desde o CFR, “na perspectiva de dar continuidade ao labor divulgativo dos proxectos educativos do CFR Ferrol encetado no curso 2016-17 coa gravación do tema musical “Chea de Vida” coa participación de Guadi Galego”, lembran. Este vídeo leva acadado xa cerca de cen mil visualizacións na plataforma Youtube.
A peza audiovisual resultante da actividade deste venres, que se desenvolverá entre as 10.30 e as 12.30 horas, será compartido a través da devandita plataforma o 17 de maio co gallo do Día das Letras Galegas.
