Os Colludos, Os Piratas de Penencia, Río Belelle, Xente de Aquí e de Acolá, O Aturuxo, Os Nenos de Lola, Tróupele Tróupele, A Revolta, Canteira, Os Argalleiros, Os Parrandolos, Os Xunquiños, Os Trastos e As Carapuchiñas acompañaron onte á sardiña no seu cortexo fúnebre polo barrio de Ultramar ata o a súa incineración na praza. Foi o último acto oficial do Entroido de Ferrol, aínda que nas asociacións veciñais aínda esta fin de semana se organizan festas de disfraces.
Hoxe hai baile infantil na Sociedade Cultural, Recreativa e Deportiva San Carlos, de cinco a oito da tarde. Haberá larpeiradas, animación con La Guagua e sorteo de produtos do Entroido. No local da Asociación de Veciños San Xoán-Bertón haberá festa a partir das sete coa actuación de Xilo e premio ó mellor disfraz e mañá domingo, á mesma hora, actúa Tania. Na AVV da Cabana o baile será para adultos (o de nenos foi onte), ás 22.30 horas, e con música do Dúo Jalisco. Ademais, os locais de Catabois ofrecerán descontos desde as sete da tarde ata a medianoite.
