Unha mesa redonda sobre o emprendemento desde a Formación Profesional así como o espectáculo de rap e parkour a cargo de varios alumnos do centro puxeron onte o colofón ás II Xornadas de Acceso ao Emprego e Relación coas Empresas celebradas desde o xoves polo CIFP Rodolfo Ucha Piñeiro.
Representantes de entidades e proxectos empresariais como Enxendra, de seguridade informática; Sigue tu liga.com, unha plataforma de resultados de fútbol; ou Gaithsa, unha firma virtual de deseño en 3D posta en marcha por alumnos do centro no marco da actividade do Viveiro de Empresas, compartiron coloquio con Enrique Sanfiz, que falou do “crowfunding” –microfinanciamento– ou co coordinador do devandito viveiro do Rodolfo Ucha, Julio Lage.
Pero a derradeira sesión das xornadas deu para moito máis, xa que desde as 9.30 horas sucedéronse as sesións destinadas aos alumnos das diferentes familias profesionais –Informática e comunicacións, Actividades físicas e deportivas ou Edificación e obra civil, entre outras– nas que, entre outras moitas cuestións, abordáronse temas como hardware libre, os perfís profesionais no sector da Informática, a tarxeta profesional ou a innovación e creatividade.
O obxectivo das xornadas foi o de achegar aos estudantes ao ámbito laboral.
