A Festa da Lectura, do Libro e da Palabra de Ferrol celebrarase na praza da Constitución entre os días 19 e 23 de abril. Estará dedicada a Ricardo Carvalho Calero, con quen se traballará nos obradoiros infantís de chapas e cadernos que se celebrarán polas mañás.
Tamén haberá unha mención especial a Roberto Vidal Bolaño, homenaxeado no Día das Letras Galegas, coa presentación do libro e audiovisual “Un chapeu negro e un nariz de paiaso” e coa función teatral “Touporroutou”, que escenificará para un público infantil a compañía Maquinarias.
A concelleira de Educación, Susana Martínez Galdós; Antonio Fernández Maira, representante da Federación de Libreiros de Galicia; e Manuel Rodríguez, presidente da Agrupación de Libreiros de Ferrolterra, presentaron hoxe publicamente o programa, que se abrirá cun pregón, o venres 19, a cargo de Celso Fernández Sanmartín, contador de historias tradicionais.
Haberá un total de oito postos e daranse a coñecer máis de media ducia de novidades editoriais. Os rapaces serán os principais destinatarios das actividades complementarias, como actuacións musicais (dos alumnos e profesores do Xan Viaño e da Banda Ferrolá) e representacións teatrais.
