Como é habitual, o Entroido escolar convertiuse onte unha vez máis nun auténtico desfile de laboriosas e orixinais confeccións elaboradas nas propias aulas e, na meirande parte dos casos, con materiais como plásticos, cartulinas, pinturas e pouco máis. Baixo unha temática común de-senvolveron a súa cita moitos dos centros educativos da comarca: os xogos, no caso do Belén -parchís, comecocos, etc– ; as particulares homenaxes brindadas a Miliki tanto no colexio San Rosendo como no Cruceiro de Canido, onde os paiasos foron os auténticos protagonistas; o mar no CEIP Recimil, no que se podía ver unha ampla variedade de sepecies mariñas; ou as profesións no colexio Mercederias –desde cociñeiros a policías pasando por pintores–, ofreceron unha animada xornada que, iso si, tivo que facer fronte ás inclemencias do tempo. De feito, algúns centros optaron por modificar os percorridos dos desfiles que tiñan previstos nun primeiro momento ante as intermitentes choivas que se deron ao longo da mañá de onte.
A exhibición dos disfraces foi acompañada, como é habitual,de comparsas e cantigas que os alumnos interpretaron nos propios centros, así como de festivais aos que, nalgúns centros, os alumnos puideron ir disfrazados ao seu gusto. Á sesión lúdica da mañá deu paso, en moitos casos, ás festas celebradas pola tarde polas Anpas.
