“Nos últimos dous ou tres días unhas 200 persoas, incluíndo músicos e artistas de aquí a Nova York, puxéronse en contacto comigo para apoiarme coas Meninas, así que xa está decidido que se fará. Será ou o 15 ou o 16 de xuño, nuns días saberémolo”. Así fala Eduardo Hermida, o promotor das Meninas de Canido que, tras rematar a súa terceira edición en 2010, recupera a vida grazas ao apoio europeo e aos ánimos do propio barrio, xa que a iniciativa naceu en 2008 precisamente para chamar a atención sobre o seu estado.
“Eu xa dera por finalizada esta etapa –lembra Hermida– pero un home que naceu en Canido e vive en París, Ignacio Fernández, da asociación Eau et Lumière, quedou fascinado co que viu e chamou a atención do Consello Europeo de Itinerarios Culturais. En verán chamáronme a París a unha reunión na que estaban un exministro de Sarkozy e a concelleira de Cultura da cidade. O tema era apoiar unha ruta cultural e turística en Canido como a que existe en Barbizon, adicada a Millet, ou a de Auverse-sur-Oise, dedicada a Van Gogh. Só pedían o apoio institucional para garantir a súa continuidade”.
O entusiasmo de Eduardo Hermida parece non ser compartido no Concello de Ferrol según relata o artista. “Despois de pasar de Cultura a Educación e de aí a Turismo, falei cunha asesora que era da Coruña e non sabía nin onde estaba Canido. Cando finalmente quedamos non apareceu porque dixo que chovía. Moito interese non deben ter a pesar de que o gasto son os materiais dos pintores e o equipo de amplificación de son, porque aquí todo o mundo traballa gratis e polo ben do barrio”.
solución
Segundo Hermida, se a única condición que poñen en Europa para promocionar a ruta artística de Canido é a súa continuidade, “desde aquí asegurámola. Estamos barallando como podemos facer cos gastos, que como moito poden ser 2.000 euros, incluíndo a comida, así que pensamos en colocar uchas nos bares ou tamén poñer a iniciativa na plataforma Verkami e facer crowdfunding, como fixeron para gravar os seus discos artistas como Al Vila ou Os Cempés”. En canto á data “trasladaríamola ao mes de xuño, o 15 ou o 16, para que os colexios estivesen aínda con actividade e os escolares tamén puidesen participar, porque a principios de setembro as clases aínda non comezaron”.
Para Hermida, a confirmación da ruta “suporía unha atracción turística para Ferrol, como sucede cos itinerarios culturais adicadas a Millet e Van Gogh. As posibilidades son enormes”.
