O Pazo da Cultura de Narón acolleu onte a estrea da nova peza de Teatro do Morcego, “Presidente”, e hoxe ás 20.00 horas volverá ao escenario esta “comedia de manipulación política”, como a define o seu autor e director, José Luis Prieto. A obra está protagonizada por Celso Parada, César Goldi, Federico Pérez, a pontesa Mercedes Castro e a naronesa Iolanda Muíños. Con estes vimbios a compañía quixo retratar o actual ambiente político e “amosar os límites aos que pode chegar a política hoxe” coa historia dun político ao que non lle van ben as enquisas e é capaz de presentarse nas casas dos votantes para convencelos.
Momentos antes da concorrida estrea, Prieto destacaba que con esta obra intentara “facer unha comedia pero non tanto de gargallada. O que trato é crear o efecto de sorpresa no espectador, pero fundamentalmente estou nisto para entreter”.
inspirado por rajoy
O autor e director naronés destaca que aínda que a obra “podería pasar nun país próximo, moi próximo”, non está baseada nun feito real. “Non –adianta Prieto–, aínda que si inspirada naquel vídeo de Rajoy no que ía chamando polas portas para presentarse. Quedeime con iso”.
En canto ao elenco actoral, o dramaturgo confesa que “teñen moita química. Xogamos con xente coa que xa traballara como Goldi ou Iolanda, e con xente como Federico ou Mercedes acousa funcionou moi ben. En canto a Celso Parada, o protagonista, creo que está a unha gran altura. Celso é unha forza da natureza. Traballar con todos eles é un luxo porque teñen experiencia e unha calidade contrastada. Pasámolo ben”.
Trala súa estrea de onte, e do pase desta noite no Pazo da Cultura de Narón, a comedia “Presidente” irá a Compostela e logo xirará por toda Galicia, algo sobre o que non todas as obras novas poden fachendear.
