O Teatro Jofre abrirá esta tarde as súas portas a unha nova sesión do do ciclo de cineconcertos organizado pola Concellería de Cultura de Ferrol. Desta volta, será a película “O home mosca”, a obra mestra de Harold Lloyd, a protagonista.
A súa proxección acompañarase da música en directo do pianista Adrián Begoña, que chega á cidade naval co seu formato de trío. Unha das especialidades desta formación é poñer música a películas clásicas do cinema mudo, improvisando en directo. Nos últimos anos fixérono con máis de 25 títulos en diversas salas de proxección.
Escena
A escena do xenial cómico escalando un edificio supón un dos momentos máis grandes do cinema mudo e o seu clímax –Harold colgado das manillas do reloxo– segue sendo unha das escenas estelares da historia da sétima arte.
Os cineconcertos son unha atactiva proposta do Jofre onde o espectador pode gozar da proxeccións dalgúns dos mellores títulos do patrimonio fílmico universal coa música en directo de grandes compositores e intérpretes. As entradas custan dez euros.
