Unha gran estrea no escenario do Pazo da Cultura con “Manual de Patronaxe”

O Pazo da Cultura vístese de gala esta fin de semana e non é para menos. “Manual de patronaxe” aterra nesta pista naronesa, pero tamén a nivel xeral, posto que os dous pases que están programados –venres ás 20.30 horas e sábado ás 20.00– serán as dúas primeiras postas en escena que fará esta obra, un texto orixinal de Nerea Brey que poñen en vida Iolanda Muíños, Susana Sampedro e Raquel Espada.

A produtora artística da compañía Teatro do Noroeste, encargada de levar a cabo esta función, Eva Blanco, explica que a temática céntrase nalgo que “na sociedade de hoxe en día estamos a ter descoidado. Esta proposta é un pouco unha homenaxe aos nosos e ás nosas coidadoras, ás nosas avóas”, explica Blanco, que, ademais, incide en que esta era a vocación orixinal do texto de Brey e que “nós, ao levalo á escena, respetámolo completamente e incluso puxemos un pouco do noso”, avanza.

E aínda que non se pode desvelar todo, adianta que o público vai ter que descubrir “que parte é da autora e cal da compañía, onde hai ficción e onde non”, un reto que vai ser máis complexo do que pode asemellar, xa que as tres actrices que levan a cabo o espectáculo “entran no escenario sendo elas e, despois, van incorporando ás súas personaxes”.

O equipo atópase agora mesmo inmerso nas últimas pinceladas de cara a dar a coñecer esta dramaturxia despois dun longo tempo de ensaios, están xa listos para o municipio naronés. “Estamos agora instalándonos no Pazo da Cultura para facer os últimos pases xerais antes da gran estrea, facendo a residencia técnica e, como sempre, estamos encantados de poder estar aquí. Teatro do Noroeste ten moi boa percepción da localidade porque sempre que vimos estrear aquí resulta marabilloso”, explican desde a agrupación, agradecendo non só o espazo que brindan as instalacións municipais, senón tamén o calor dun público que non defrauda.

E máis, deixando entrever o que pode esperar o patio de butacas, Blanco avanza que Muíños, Sampedro e Espada, ademais de ser “marabillosas profesionais”, van ser quen de “empatizar e conectar” con todos e todas aqueles que opten por achegarse ao Pazo durante esta fin de semana. Iso si, advirte de que, a pesar de que non farán falta panos para secar bágoas, a obra vai apelar “á emoción, ao goce e á risa. Sen dúbida vai tocar un pouco o corazonciño”.

“É posible que máis dun sinta a emoción a flor de pel porque ao final falamos dunha historia de vida”, explica produtora, xa que “Manual de Patronaxe” non só é unha homenaxe, como xa se mencionou, senón que é unha oda na que se volve, en certa forma, á infancia, “ao tempo que Brey pasou coa súa avóa mentres ela facía arranxos, porque era modista”.

A título personal, Blanco destaca “unha ollada moi feminista sobre as nosas referentes e coidadoras, que nos axudaron a ser as persoas que somos agora”.  E como non podía ser doutra forma, son tres mulleres as que farán este recorrido vital.