Desde 2019, un grupo de veciños da parroquia de Santa Icía son os encargados da organización das festas patronais. Houbo un parón entre 2020 e 2022 e ao ano seguinte a mesma comisión, con algúns integrantes menos, fíxose de novo cargo da preparación das festas, que son da parroquia, como se encargan de matizar, e non do barrio, xa que abarcan tanto a zona rural como a urbana de Santa Icía, e mesmo entre dous concellos, Narón e Ferrol, xa que hai parte en cada un dos municipios.
A comisión actual, formada por cinco persoas e varias da mesma familia, anuncia xa que este será o seu último ano da organización, porque, como explica Begoña, unha das súas integrantes, “é complicado compaxinar a vida familiar coa organización, queremos descansar pero non é un punto final senón á parte e por iso animamos a gozar a outra xente desta experiencia alomenos unha vez na vida, porque aínda que dá moito traballo é un orgullo ver disfrutar aos demais e a nós mesmos”.
A preparación dos festexos comeza pouco despóis de rematar os anteriores e así Begoña explica que os grupos e orquestras hai que collelos con previsión. En Santa Icía non contratan ás grandes orquestras que pasaron por festas doutros barrios porque, indican desde a Comisión, “financiámonos basicamente cos cartos dos veciños e dos negocios, sobre todo os pequenos. Neste sentido, hai que dicir que a colaboración é marabillosa, tanto a nivel individual como de establecementos e contamos tamén nestes tres días de festas con moitísima xente detrás, prestando apoio”.
Pese a isto, saben que será difícil contar con outra comisión “porque é un traballo duro e se te comprometes hai que cumprir. Recibes cartos de donacións e hai que invertilos integramente para a realización dos festexos, hai que ser serio e é moito traballo”.
Aínda que económicamente non reciben cartos das administracións, desde a Comisión síntense arropados por elas. Explican deste xeito que “poñen a limpeza, os contedores, cortes de campos, alerta do Speis e todo o acompañamento da Policía local de Ferrol na procesión, entre outras cousas; ademais, como é necesario un plan de prevención, calquera dúbida nola solucionan ao momento”.
Este apoio e o da veciñanza foi crecendo dende que esta Comisión de festas se fixo cargo da organización e así o confirma Begoña que indica que “desde o 2019 ata agora a colaboración foi en aumento, porque si van vendo que es honrado e fas as cousas ben nótase máis apoio, dos veciños, dos pequenos negocios. Por iso hai que mercar na zona, porque se o pequeno comercio morre, tamén o fai a parroquia”. A Comisión lembra precisamente a xente da parroquia que morreu neste ano e polos que nestas festas votarán unha peza.
Medidas de tráfico e estacionamento para os días de celebracións
Aínda que as festas non comezan ata o venres, as atraccións xa van chegando a Santa Icía estes días e xa se preparan dende o Concello medidas de seguridade para evitar o acceso dos coches particulares á zona. Estas restricións funcionarán a partir do venres 5 de setembro.
A Comisión de Festas explica que se reordenará o tráfico nos arredores do campo da festa, polo que piden á veciñanza que se respeten os sinais e as vallas que se coloquen. Mostran o seu agradecemento ao Concello de Narón e Bombeiros do Speis por estar en alerta así como ao hospital e centro de saúde de referencia, entre outros colaboradores e empresas.
